चार वर्षांपासून फरार असलेला आरोपी खडकी पोलिसांच्या जाळ्यात; जॉन परवेझ इराणी जेरबंद

खडकी पोलिसांची धडक कारवाई; गुप्त बातमीदाराच्या माहितीमुळे यश
​पुणे:
खडकी पोलीस स्टेशनच्या हद्दीत दाखल असलेल्या गंभीर गुन्ह्यात गेल्या चार वर्षांपासून फरार असलेल्या एका कुख्यात आरोपीला खडकी पोलिसांनी अखेर जेरबंद केले आहे. जॉन परवेझ इराणी (रा. पाटील इस्टेट, इराणी वस्ती, खडकी) असे अटक करण्यात आलेल्या आरोपीचे नाव आहे.
​गुन्ह्याचा तपशील:
खडकी पोलीस स्टेशन येथे सी.आर. क्रमांक ०२/२०२२, भारतीय दंड संहिता (IPC) कलम ३५४ व ३२६ अन्वयचे गंभीर गुन्हे दाखल आहेत. या गुन्ह्यान्वये जॉन परवेझ इराणी हा मागील चार वर्षांपासून लपून राहत होता आणि पोलिसांना गुंगारा देत होता.
​पोलीस पथकाची कामगिरी:
या प्रकरणाचा तपास सुरू असतानाच, खडकी पोलीस स्टेशनच्या महिला पोलीस अंमलदार स्वाती मस्के आणि पोलीस अंमलदार सुशांत भोसले यांना गुप्त बातमीदारामार्फत आरोपीबाबत अत्यंत महत्त्वाची आणि खात्रीशीर माहिती मिळाली.
​मिळालेल्या माहितीच्या आधारे, पोलीस उपायुक्त आणि सहायक आयुक्तांच्या मार्गदर्शनाखाली, खडकी पोलीस स्टेशनचे वरिष्ठ पोलीस निरीक्षक विक्रम सिंह कदम आणि पोलीस निरीक्षक (गुन्हे) किरण गायकवाड यांच्या सुचनांनुसार, तपास पथकाचे प्रभारी सहायक पोलीस निरीक्षक दत्तात्रय गुळींग यांच्या नेतृत्वाखाली एका विशेष पथकाने सापळा रचून आरोपी जॉन परवेझ इराणी याला शिताफीने ताब्यात घेतले.
​सहभागी अधिकारी व कर्मचारी:
सदर यशस्वी कारवाईत पोलीस हवालदार चक्रधर पवार, पोलीस अंमलदार गालिब मुल्ला, अमोल राणे आणि संतोष लाडके यांनी सक्रिय सहभाग घेतला.
​चार वर्षांपासून कायद्याच्या हाताला हुलकावणी देणाऱ्या फरार आरोपीला पकडण्यात खडकी पोलिसांना यश आल्यामुळे नागरिकांमधून पोलिसांच्या या कामगिरीचे कौतुक होत आहे. सदर गुन्ह्याचा पुढील अधिक तपास खडकी पोलीस स्टेशनकडून केला जात आहे.