कायमस्वरूपी कर्मचाऱ्यांना २७ हजार, तर कंत्राटी कामगारांना १० हजारांचा बोनस

पुणे 

पुणे महानगरपालिकेतील कायमस्वरूपी अधिकारी आणि कर्मचाऱ्यांसह कंत्राटी कामगारांसाठी दिवाळीच्या पार्श्वभूमीवर आनंदाची बातमी समोर आली आहे. महापालिकेच्या कायमस्वरूपी कर्मचाऱ्यांना २७ हजार रुपये बक्षीस रक्कम आणि ८.३३ टक्के सानुग्रह अनुदान देण्याच्या प्रस्तावाला पक्षनेता सभेने मान्यता दिली आहे. तर महापालिकेतील सर्व कंत्राटी कर्मचाऱ्यांना सन २०२६ साठी प्रत्येकी १० हजार रुपये दिवाळी बोनस देण्याचा निर्णय स्थायी समितीच्या बैठकीत घेण्यात आला आहे.

कायमस्वरूपी कर्मचाऱ्यांसाठी पाच वर्षांचा करार

पुणे महापालिकेतील अधिकारी व कर्मचाऱ्यांच्या बोनससंदर्भातील प्रस्तावाला पक्षनेता सभेने मंजुरी दिली आहे. या प्रस्तावानुसार यंदा ८.३३ टक्के सानुग्रह अनुदानासह २७ हजार रुपये बक्षीस रक्कम मिळणार आहे. यासाठी पाच वर्षांचा करार करण्यात येणार असून, पुढील प्रत्येक वर्षी बक्षीस रकमेत दोन हजार रुपयांची वाढ प्रस्तावित आहे. बोनससाठी १८० दिवसांची हजेरी ग्राह्य धरण्यात येणार असून, एक वर्ष सेवा आणि १८० दिवस हजेरीची अट रद्द करण्याचाही निर्णय प्रस्तावात समाविष्ट आहे.

कंत्राटी कामगारांनाही १० हजारांचा बोनस

दुसरीकडे, पुणे महानगरपालिकेतील सर्व कंत्राटी कर्मचाऱ्यांना सन २०२६ साठी प्रत्येकी १० हजार रुपये दिवाळी बोनस देण्याचा निर्णय स्थायी समितीच्या बैठकीत घेण्यात आला आहे. पुणे महापालिका कामगार युनियनने या निर्णयाची माहिती दिली.

अंतिम मंजुरीनंतर बोनस वितरण

कायमस्वरूपी कर्मचाऱ्यांच्या बोनस प्रस्तावाला पक्षनेता सभेची मान्यता मिळाली असली, तरी पुढील टप्प्यात हा प्रस्ताव स्थायी समिती आणि त्यानंतर मुख्य सभेच्या मान्यतेसाठी सादर होणार आहे. अंतिम मंजुरीनंतर बोनस वितरणाची कार्यवाही केली जाणार आहे.

एकीकडे कायमस्वरूपी कर्मचाऱ्यांना २७ हजार रुपये, तर दुसरीकडे कंत्राटी कामगारांना १० हजार रुपये बोनस मिळण्याच्या निर्णयामुळे पुणे महापालिकेतील कर्मचारी वर्गात दिवाळीचा आनंद द्विगुणित होणार आहे.