PMPML हडपसर डेपोतील कामगारांच्या तक्रारींकडे प्रशासनाचे दुर्लक्ष?

टाईम कीपरविरोधातील तक्रारींची चौकशी करून कारवाईची मागणी; शिवसेना पुणे शहर प्रमुख प्रमोद भानगिरे यांचा इशारा

पुणे : PMPMLच्या हडपसर डेपोतील काही कामगारांनी टाईम कीपरकडून कथितरित्या हप्त्यांची मागणी, दादागिरी तसेच मारण्याची धमकी दिल्याच्या तक्रारी केल्याचा दावा करण्यात आला आहे. या तक्रारींबाबत वारंवार अर्ज करूनही अपेक्षित कारवाई होत नसल्याचा आरोप असून, कामगारांच्या तक्रारींकडे प्रशासन जाणीवपूर्वक दुर्लक्ष करत आहे का, असा सवाल उपस्थित करण्यात आला आहे.

कामगारांच्या म्हणण्यानुसार, संबंधित प्रकाराबाबत स्वारगेट येथील PMPML मुख्यालयातही अर्ज देण्यात आले आहेत. मात्र, तक्रारींची निष्पक्ष चौकशी करून संबंधितांची जबाबदारी निश्चित करण्याबाबत ठोस कारवाई झालेली नसल्याचा दावा करण्यात आला आहे. या आरोपांची स्वतंत्रपणे पडताळणी झालेली नसून, संबंधित अधिकारी व कर्मचाऱ्यांची बाजूही चौकशीत समोर येणे आवश्यक आहे.

कामगारांना सुरक्षित आणि सन्मानजनक वातावरणात काम करण्याचा अधिकार आहे. त्यामुळे PMPML प्रशासनाने हडपसर डेपोतील तक्रारींची तातडीने निष्पक्ष चौकशी करावी, संबंधित कामगारांचे जबाब नोंदवावेत आणि आरोपांमध्ये तथ्य आढळल्यास नियमानुसार कारवाई करावी, अशी मागणी शिवसेना पुणे शहर प्रमुख प्रमोद भानगिरे यांनी केली आहे.

“कामगारांच्या तक्रारींकडे दुर्लक्ष करून हा प्रश्न दडपण्याचा प्रयत्न झाल्यास शिवसेना गप्प बसणार नाही. PMPML प्रशासनाने तातडीने चौकशी करून कामगारांना न्याय द्यावा; अन्यथा शिवसेनेच्या वतीने रस्त्यावर उतरून तीव्र आंदोलन छेडण्यात येईल,” असा इशारा प्रमोद भानगिरे यांनी दिला.

दरम्यान, PMPMLच्या हडपसर डेपोशी संबंधित तक्रारींवर प्रशासन कोणती भूमिका घेते आणि चौकशीनंतर काय कारवाई केली जाते, याकडे कामगारांचे लक्ष लागले आहे.

हडपसर PMT डेपो व्यवस्थापक मनोहर पिसाळ यांच्याशी संपर्क साधला असता ते म्हणाले की सोमवार पासून खातेनिहाय चौकशी सुरू होईल, त्यानंतर अहवाल येईल त्यामध्ये जे दोषी आढळतील त्यांच्या नियमानुसार कायदेशी कारवाई करण्यात येईल.