फुरसुंगी :
हडपसर – सासवड मार्गावरील फुरसुंगी हद्दीत भरधाव कंटेनर व चारचाकी यांच्यात झालेल्या अपघातात चारचाकीतील तरुणाचा जागीच मृत्यू झाला. बुधवारी (ता. 29) मध्यरात्री अडीच वाजण्याच्या सुमारास फुरसुंगी, पॉवर हाऊसजवळ हि घटना घडली आहे. याप्रकरणी काळेपडळ पोलीस ठाण्यात कंटेनर चालकावर गुन्हा दाखल करण्यात आला आहे.
अक्षय बाळासाहेब चिव्हे (वय- 31, रा. संयोग कॉलनी काळेपडळ/अपेक्षा लॉन्स जवळ पावर हाऊस फुरसुंगी) असे अपघातात मृत्यूमुखी झालेल्या तरुणाचे नाव आहे. याबाबत बाळासाहेब महादेव चिव्हे (वय – 59) यांनी काळेपडळ पोलीस ठाण्यात फिर्याद दिली. त्यांनी दिलेल्या फिर्यादीनुसार, कंटनेर चालकाविरुद्ध गुन्हा दाखल करण्यात आला आहे.
पोलिसांनी दिलेल्या माहितीनुसार, अक्षय चिव्हे यांचे हडपसर भागातील काळेपडळ परिसरात मोबाइल विक्रीचे दुकान आहे. बुधवारी मध्यरात्री अडीचच्या सुमारास अक्षय हडपसर-सासवड रस्त्यावरुन मोटारीतून घरी निघाले होते. त्या वेळी फुरसुंगीतील पॉवर हाऊसजवळ भरधाव मालवाहून कंटेनरने मोटारीला धडक दिली. अपघातात मोटारचालक अक्षय गंभीर जखमी झाले.
दरम्यान, या घटनेची माहिती मिळताच पोलिसांनी घटनास्थळी धाव घेतली. गंभीर जखमी झालेल्या अक्षय यांचा उपचारांपूर्वीच मृत्य झाला.
